Dag ok op de Siet vun Birgit Lemmermann

Birgit Lemmermann kummt vun de Stader Geest, ut Ahlerst-Klethen, nipp un nau. Se is as Buurdeern groot, un so ok Plattsnackersch worrn. In Buxthuud hett se ehr Abi maakt, is denn to ’n Studeren un Arbeiden na Hessen utneiht, man wedder torüch komen, ok, wiel ehr dat Plattdüütsche fehlen dee.

Birgit Lemmermann is Schoolmestersch, un se wohnt bi Rodenborg an de Wümm.

1992 wörr Söhn Johan Michel boren, de platt opwassen schull. Man wieldat wied un sied kuum Kinnerböker op Platt to kriegen weern, hett Mudder Lemmermann sik sülvst an ’t Wark maken müsst. So is denn in de Jahren vun 1994 bit 2000 mit „Ut’n Leven vun Emil“, „Ut de Kinnertiet vun Emil“ un „Wenn de Sünn mööd slapen geiht…“ de Trilogie mit den lütten witten Baar togang komen, de nu al as Kinnerbook-Klassiker gellen deit.

De Schrieversch is Maat bi den „Schrieverkring Weser-Ems e.V.“, se is mit Texten för Grote in verscheden Anthologien binnen. Bi den Freudenthal-Pries is se al en paar Maal bi de Vörsten dorbi ween, 2007 hett de dor den tweten Platz beleggen kunnt, un 2006 den eersten Pries bi den „Vertell doch mol“-Wettstriet vun ’n NDR kregen. Ok 2007 is ehr Geschicht mit in en Book opnomen worrn.

För Ebbe un Hehn hett Lemmi den Lüttjepütt-Pries 2007 kregen, de för plattdüütsche Kinner- un Jugendarbeit utschreven is. Dit Book is wat  Nee’es op dat Rebeet twüschen Kinnerbook un Book för Grote, denn egens gift dat woll kuum en plattdüütsch Wark för junge Lüüd. Ok de Pries „Plattdeutsches Buch des Jahres“ is an Ebbe un Hehn vergeven worrn.