Dag ok op de Siet vun Birgit Lemmermann

Birgit Lemmermann maakt siet 1994 „Platt för Kinner un Junge Lüüd“. De dree Böker över den witten Baar Emil sünd bilütten wied un sied bekennt.

Birgit Lemmermann kummt vun de Stader Geest, ut Ahlerst-Klethen, nipp un nau. Se is as Buurdeern groot, un so ok Plattsnackersch worrn. In Buxthuud hett se ehr Abi maakt, is denn to ’n Studeren un Arbeiden na Hessen utneiht, man wedder torüch komen, ok, wiel ehr dat Plattdüütsche fehlen dee.

Birgit Lemmermann is Schoolmestersch, un se wohnt bi Rodenborg an de Wümm.
1992 wörr Söhn Johan Michel boren, de platt opwassen schull. Man wieldat wied un sied kuum Kinnerböker op Platt to kriegen weern, hett Mudder Lemmermann sik sülvst an ’t Wark maken müsst. So is denn in de Jahren vun 1994 bit 2000 mit „Ut’n Leven vun Emil“, „Ut de Kinnertiet vun Emil“ un „Wenn de Sünn mööd slapen geiht…“ de Trilogie mit den lütten witten Baar togang komen, de nu al as Kinnerbook-Klassiker gellen deit.

In’n Augustmaand 2007 is ehr  Jugendbook Ebbe un Hehn rutkomen.  För Ebbe un Hehn hett Lemmi vun de Neddersassisch Spaarkassenstiften den Lüttjepütt-Pries 2007 kregen, de för plattdüütsche Kinner- un Jugendarbeit utschreven is. Dit Book is wat Nee’es op dat Rebeet twüschen Kinnerbook un Book för Grote, denn egens gift dat woll kuum en plattdüütsch Wark för junge Lüüd. Ok de Pries „Plattdeutsches Buch des Jahres“ is 2007 vun de Carl-Toepfer-Stiften in Hamborg un dat INS Bremen an Ebbe un Hehn vergeven worrn.

De Schrieversch is Maat bi den „Schrieverkring Weser-Ems e.V.“, se is mit Texten för Grote in verscheden Anthologien binnen. Bi den Freudenthal-Pries is se al en paar Maal bi de Vörsten dorbi ween, 2007 hett se dor den tweten Platz beleggen kunnt, un 2006 den eersten Pries bi den „Vertell doch mol“-Wettstriet vun ’n NDR, to lesen in den Band „De Familienfier“. Ok 2007 is ehr Geschicht in dat Book „Bi Nacht“ opnomen worrn. 2008 hett ehr Geschicht to dat Thema „In de School“ den föfften Platz afkregen. 2008 hett de Freudenthal-Sellschaap den Freudenthal-Förderpries an Birgit Lemmermann geven.

2008 hett de Freudenthal-Sellschaap ehr Höörstück „Kaffeetafel mit Fleeg“ mit den Förderpries bedacht, un in 2009 hett se dorför den „Hanns-Hennig-Holm-Preis“ för Hörspelen kregen. Georg Bühren vun den WDR hett dat Stück in Münsterlänner Platt överdragen un de WDR hett dat utstrahlt.

„Avend an de Regentünn“, en Kattenbook, is 2008 bi den Schünemann-Verlag in Bremen rutkomen. Översett hett Lemmermann twee Kinnerböker för dissen Verlag un in den Septembermaand 2010 is Ildiko von Kürthy ehr Romaan „Schwerelos- op Platt“ op den Markt bröcht worrn, översett vun Lemmi. Mehr dorto ünner „Lemmermann bi Schünemann“ bi „Kieken un Hören“ an de Siet. De Klaus-Groth-Pries 2011 för Lyrik weer an den 24. Juni 2011 in de Stadt Heide an Lemmi övergeven.

Dat Neeste: „De Deerten wüllt Pannkoken freten“ - so heet dat nee Book för lüttje Plattsnackers un anner Lüüd, dat Birgit Lemmermann nu jüst maakt hett. Mit Jan Graf tohoop, de den Text schreev. De Deerten hebbt Smacht un maakt sik an `t Wark, `n groten Bülten Pannkoken to backen. Alltohoop packt mit an, dat dat ok wat warrt. Man amenn warrt dat grote Freten denn doch op enen annern Dag verleggt… Af foorts to kriegen, op disse Websiet ünner Bestell Maal. Orer gau even pingeln: Tel. 04269 10 58 33  (ISBN 9-78398-1-3598-17, för 15,60 Euro)