Dag ok op de Siet vun Birgit Lemmermann

Dat Neeste: Dat ik den Freudenthalpries för 2020 wunnen heff, freit mi düchtig. Man nu is de Fier wegen Corona utfallen un warrt eerst neegst Jahr angahn. Schiet ok! Na: Schaadt ok nich. (Mehr erfahren ...)

Birgit Lemmermann maakt siet 1994 „Platt för Kinner un Junge Lüüd“. De dree Böker över den witten Baar Emil sünd bilütten wied un sied bekennt.

Birgit Lemmermann kummt vun de Stader Geest, ut Ahlerst-Klethen, nipp un nau. Se is as Buurdeern groot, un so ok Plattsnackersch worrn. In Buxthuud hett se ehr Abi maakt, is denn to ’n Studeren un Arbeiden na Hessen utneiht, man wedder torüch komen, ok, wiel ehr dat Plattdüütsche fehlen dee.

Birgit Lemmermann is Schoolmestersche, na Jahren bi de Waldörpschool in Otterbarg un an ’t Ratsgymnasium in Rodenborg nu an dat Aue-Geest-Gymnasium in Harsefeld, un se wohnt wedder in den Kohstall, woneem se herkummt. 1992 wörr Söhn Johan Michel boren, de platt opwassen schull. Man wieldat wied un sied kuum Kinnerböker op Platt to kriegen weern, hett Mudder Lemmermann sik sülvst an ’t Wark maken müsst. So is denn in de Jahren vun 1994 bit 2000 mit „Ut’n Leven vun Emil“, „Ut de Kinnertiet vun Emil“ un „Wenn de Sünn mööd slapen geiht…“ de Trilogie mit den lütten witten Baar togang komen, de nu al as Kinnerbook-Klassiker gellen deit.

In’n Augustmaand 2007 is ehr Jugendbook Ebbe un Hehn rutkomen.  För Ebbe un Hehn hett Lemmi vun de Neddersassisch Spaarkassenstiften den Lüttjepütt-Pries 2007 kregen, de för plattdüütsche Kinner- un Jugendarbeit utschreven is. Dit Book is wat Nee’es op dat Rebeet twüschen Kinnerbook un Book för Grote, denn egens gift dat woll kuum en plattdüütsch Wark för junge Lüüd. Ok de Pries „Plattdeutsches Buch des Jahres“ is 2007 vun de Carl-Toepfer-Stiften in Hamborg un dat INS Bremen an Ebbe un Hehn vergeven worrn.

De Schrieversch is Maat bi den „Schrieverkring Weser-Ems e.V.“ ween, se is mit Texten för Grote in verscheden Anthologien binnen. Bi den Freudenthal-Pries is se al en paar Maal bi de Vörsten dorbi ween, 2007 hett se dor den tweten Platz beleggen kunnt, un 2006 den eersten Pries bi den „Vertell doch mol“-Wettstriet vun ’n NDR, to lesen in den Band „De Familienfier“. Ok 2007 is ehr Geschicht in dat Book „Bi Nacht“ opnomen worrn. 2008 hett ehr Geschicht to dat Thema „In de School“ den föfften Platz afkregen.

2008 hett de Freudenthal-Sellschaap ehr Höörstück „Kaffeetafel mit Fleeg“ mit den Förderpries bedacht, un in 2009 hett se dorför den „Hanns-Hennig-Holm-Preis“ för Hörspelen kregen. Georg Bühren vun den WDR hett dat Stück in Münsterlänner Platt överdragen un de WDR hett dat utstrahlt.

„Avends an de Regentünn“, en Kattenbook, keem 2008 bi den Schünemann-Verlag in Bremen rut. Översett hett Lemmermann twee Kinnerböker för dissen Verlagun 2010 Ildiko von Kürthy ehren Romaan „Schwerelos- op Platt“. Dat Book „Blackhex“ is 2012 rutkomen. Disse Böker köönt Ji hier kriegen, ünner Bestell Maal.

De „Klaus-Groth-Pries“ 2011 för Lyrik weer 2011 in de Stadt Heide an Lemmi övergeven.

För „Ünner dat, wat baven liggt…“ hett se in ’n September 2012 in Soltau  den Freudenthal-Pries verlehnt kregen. Wat schöön, dat Hein Kröger em övergeven hett.

„De Deerten wüllt Pannkoken freten“ - so heet dat Book för lüttje Plattsnackers un anner Lüüd, dat Birgit Lemmermann mit Jan Graf tohoop maakt hett, de den Text schreev. De Deerten hebbt Smacht un maakt sik an `t Wark, `n groten Bülten Pannkoken to backen. Alltohoop packt se mit an, dat dat ok wat warrt. Man amenn warrt dat grote Freten denn doch op enen annern Dag verleggt… Op disse Websiet ünner Bestell Maal to kriegen.

Den "Heinrich-Schmidt-Barrien-Pries" för dat Bewahren vun’t Nedderdüütsche hett de Jury vun dat "Huus op'n Bulten", wor Heinrich Schmidt-Barrien en groten Deel vun sien Leven tobröcht hett, 2013 in de Kark Sankt Jürgen verlehnt. Op dat Bild sünd Johannes Rehder-Plümpe vun dat Huus op'n Bulten un de Laudator Heiner Egge ut Dithmarschen mit op.

In den Novembermaand 2013 geev dat den 23. Kappelner Literaturpries. De Jury, de vun den Sleswig-Holsteenschen Heimaatbund stellt warrt, begrünn dat so:

Seit mehr als zwei Jahrzehnten gibt Birgit Lemmermann mit ihren Werken der plattdeutschen Literatur innovative Impulse. Für das Genre Bilderbuch hat sie mit der „Emil“- Trilogie ästhetische Maßstäbe gesetzt. „Ebbe un Hehn“, als Roman für Jugendliche ein Novum auf dem Büchermarkt, ist einfühlsam fabuliert und kommt ohne durchsichtige Pädagogik aus. Birgit Lemmermann ist unangepasst und kompromisslos. Das zeichnet sie nicht nur als Malerin aus, es gilt in gleicher Weise für ihre skurrilen Erzähltexte und ihre subtile Poesie. Wie unverwechselbar ihre Handschrift ist, zeigt auch das jüngste Künstlerbuch. „Black Hex“ ist die phantasievolle Reimerzählung über eine eigenwillige Hexe und zugleich Anmahnung für alte wie junge Leser, dem gewöhnlichen Gang der Dinge zu misstrauen.

„Ebbe und Huhn“, de hoogdüütsche Versioon vun dat Originaal „Ebbe un Hehn“, is mit den Verlag Atelier im Bauernhaus in Fischerhude togang komen. To kriegen över www.emil-online.de orer över www.atelierbauernhaus.de. Ditmaal en hoogdüütsch Book; se hett „Ebbe un Hehn“, ehren plattdüütschen Jugendromaan, överdragen. Egens weern dat Lesers vun dat Orginaal, de naschüdden, wat dat Book in Hoogdüütsch rutkomen schull. Dat is ok goot so: För all de Noch-Nich-Ganz-So-Goot-Plattsnackers; för all de Lüüd, de de Plattversioon in de Plattarbeit insetten müchen un geern das Hoogdüütsche dor blangen harrn; un för all de, de geern wat leest över de Waddensee un verdwere jungsche Lüüd. Mit en Bülten Biller dorbi.